ភ្នំពេញៈ ប្រមុខក្រុមហ៊ុននុយក្លេអ៊ែររបស់ប្រទេសរុស្ស៊ីលោក Sergei Kirienko បានមានប្រសាសន៍ថាប្រទេសរុស្ស៊ីនឹងជួយប្រទេសកម្ពុជាធ្វើការងារឆ្ពោះទៅរកការបង្កើតរោងចក្រថាមពលនុយក្លេអ៊ែរមួយនៅក្រោមកិច្ចព្រមព្រៀងមួយដែលប្រទេសទាំងពីរបានចុះហត្ថលេខានៅដើមសប្តាហ៍នេះ។
កម្ពុជាត្រូវពឹងផ្អែកស្ទើរទាំងស្រុងក្នុងការផលិតថាមពលដោយឥន្ធនៈ និងថាមពលនាំចូលយ៉ាងច្រើន។ អគ្គិសនីនៅក្នុងប្រទេសនេះស្ថិតនៅក្នុងចំណោមប្រទេសដែលមានតម្លៃថ្លៃបំផុតនៅតំបន់អាស៊ីអាគ្នេយ៍ដែលធ្វើឲ្យមានការត្អូញត្អែរចេញពីក្រុមវិនិយោគិន។
លោក Kirienko បានប្រាប់ក្រុមអ្នកកាសែតកាលពីថ្ងៃពុធនៅពេលសួរអំពីកិច្ចព្រមព្រៀងនោះថា៖ «រដ្ឋាភិបាលកម្ពុជាកំពុងពិចារណាអំពីការសាងសង់ស្ថានីយថាមពលនុយក្លេអ៊ែរមួយនៅពេលអនាគត»។
លោក ម៉េង សក្តិធារ៉ា អ្នកនាំពាក្យក្រសួងរ៉ែ និងថាមពលបានបញ្ជាក់កាលពីម្សិលមិញថាពិតជាមានការចុះកិច្ចព្រមព្រៀងនេះមែនប៉ុន្តែលោកបានបដិសេធធ្វើអធិប្បាយដោយជំរុញឲ្យទៅសួរលោក ទុន លាន អ្នកនាំពាក្យម្នាក់ទៀតដែលទទួលខុសត្រូវលើបញ្ហានេះ។
ភ្នំពេញ ប៉ុស្តិ៍ មិនអាចទាក់ទងលោក ទុន លាន ដើម្បីសុំការបំភ្លឺបានទេដោយទូរស័ព្ទរបស់លោកពុំមានអ្នកទទួល។
កិច្ចព្រមព្រៀងនោះត្រូវបានចុះហត្ថលេខានៅក្នុងអំឡុងទស្សនកិច្ចរបស់នាយករដ្ឋមន្ត្រីរុស្ស៊ីលោក Dritry Medvedev មកកាន់កម្ពុជានៅសប្តាហ៍នេះ។ នេះជាទស្សនកិច្ចលើកដំបូងមកកាន់កម្ពុជាដោយអ្នកនយោបាយជាន់ខ្ពស់រុស្ស៊ីចាប់តាំងពីឆ្នាំ ១៩៨៦ មក។
នៅក្រោមលក្ខខណ្ឌនៃកិច្ចព្រមព្រៀងនោះរុស្ស៊ីនឹងផ្តល់ជំនាញការសិក្សាស្រាវជ្រាវ និងបណ្តុះបណ្តាលកម្ពុជា។
លោក Kirienko បានថ្លែងថា៖ «ប្រហែលជាការល្អប្រសើរដែលចាប់ផ្តើមជាមួយនឹងម៉ាស៊ីនរ៉េអាក់ទ័រស្រាវជ្រាវមួយគ្រឿង និងមជ្ឈមណ្ឌលស្រាវជ្រាវមួយនៅកម្ពុជា» ដោយលោកបញ្ជាក់ថារុស្ស៊ីបានសម្រេចកិច្ចព្រមព្រៀងស្រដៀងគ្នាមួយជាមួយប្រទេស បូលីវី។ លោក Kirienko បាននិយាយថាការអភិវឌ្ឍសេដ្ឋកិច្ចគឺត្រូវការប្រភពថាមពលមួយគួរឲ្យទុកចិត្ត តម្លៃថោក និងត្រូវបានធានាឲ្យបានត្រឹមត្រូវ។
កិច្ចព្រមព្រៀងដទៃទៀតដែលត្រូវបានចុះហត្ថលេខានៅពេលបំពេញទស្សនកិច្ចនេះគ្របដណ្តប់បញ្ហាជាច្រើនដូចជាការតាមដានប្រព័ន្ធហិរញ្ញវត្ថុរបស់កម្ពុជាវិធានការនានាដើម្បីទប់ស្កាត់ការលាងលុយ។
កម្ពុជាកំពុងស្វែងរកទឹកប្រាក់បីពាន់លានដុលារពីការវិនិយោគបរទេសដើម្បីសាងសង់រោងចក្រវារីអគ្គិសនីចំនួន ៦ ត្រឹមឆ្នាំ ២០១៨ ខណៈដែលខ្លួនខិតខំប្រឹងប្រែងបំពេញតម្រូវការថាមពលក្នុងស្រុកដែលកំពុងកើនឡើង។
កម្ពុជា បានកំពុងសិក្សាបច្ចេកវិទ្យាថាមពលនុយក្លេអ៊ែរជាស្រេចដែលជំរុញដោយវិធានការស្រដៀងគ្នាជាច្រើននៅក្នុងចំណោមអ្នកជិតខាងអាស៊ីអាគ្នេយ៍របស់ខ្លួន៕ Reuters/PSA រាយការណ៍បន្ថែមដោយឆាយ ច័ន្ទនីដា